روح بلالؓی ہمارے محترم سید زید زمان حامد صاحب کا جمعہ کا خطبه ۲۵ در بار نبوی ﷺ سے سپہ سالار کے لیے پیغام ۔۔۔ جب ہم کہتے ہیں کہ آنے والی جنگوں کے لئے تیاری کریں تو لوگ سمجھتے ہیں کہ اس کا مطلب ہے کہ ہتھیار اور خوراک کے ذخائر جمع کئے جائیں لیکن حقیقت یہ ہے کہ اس نصیحت کا سب سے اہم اور توجہ طلب پہلو یہ ہے کہ اپنے آپ کو آنے والی مشکلات اور جنگوں کے لئے روحانی طور پر تیار کیا جائے۔ دنیا کے بڑے بڑے ہتھیار رکھنے کا کیا فائدہ کہ جب آپ آزمائش پڑنے پر نفسیاتی دباؤ کے زیر اثر ٹوٹ جائیں، خوفزدہ ہو کر پیٹھ دکھا دیں۔ اس روحانی و نفسیاتی زوال کی کیفیت میں آپ کے بڑے سے بڑے جنگی ہتھیار بھی کباڑ کا ڈھیر ہی ثابت ہونگے۔ یہ پاکستان بہت قیمتی ہے، اس لیے اللہ اس کو براہ راست آفات سے گزارنے کی بجائے آپ کے سامنے دوسرے ملکوں کو بطور مثال بنا کر دکھاتا ہے تا کہ آپ کو عبرت ہو۔ یوکرین، غزہ، ایران، شام، لیبیا، اللہ سبحانہ و تعالیٰ نے سب کچھ تمہاری آنکھوں کے سامنے کھول کر رکھ دیا ہے تا کہ کل جب تمہارے اوپر یہ آزمائشیں آئیں تو تم اللہ کو یہ نہ کہہ سکو، مالک ! ہمیں تو پتا ہی نہیں تھا کہ کیا تیاری کرنی ہے۔ غزہ کے مسلمانوں سے سیکھیں ۔ شیخ یاسین رحمۃ اللہ علیہ وہ اللہ کا ولی اور درویش جس نے یہ پوری تحریک مزاحمت کھڑی کی ۔ انہی کے نام پر حماس نے اپنے ٹینک شکن راکٹ کا نام یاسین راکٹ رکھا ہے۔ اس معذور بابے نے 1987 میں حماس کی بنیاد رکھی۔ اس نے سترہ سال لگا کر ایک نسل تیار کی ۔ اس سے پہلے کہ وہ ہتھیار بناتے انہوں نے ہتھیار استعمال کرنے والے شیر اور دلیر تیار کیے۔ وہ بچے جو اسرائیل کے ٹینکوں پر پتھر پھینکا کرتے تھے، اُن بچوں کی انہوں نے تربیت کی ۔ شیخ یاسین رحمۃ اللہ علیہ نے انہیں با کردار، با اخلاق، پر اسرار غازی، حافظ ناموس زن اور صداقت و امانت کا علمبردار بنایا۔ پھر اس نسل کے زور بازو پر انہوں نے خندقیں کھودیں اور پورے غزہ کے اندر اسلحے کے کارخانے لگائے۔ پورے غزہ کو حافظ قرآن بنایا۔ قرآن سے اس کی نسبت اور تعلق قائم کیا۔ چار چار سال کے بچے بھی اسرائیلی بمباری کے دوران بدحواس ہونے کی بجائے اللہ کا ذکر کرتے ہیں۔ اسی لیے جب ان پر سات ایٹم بم کے برابر بمباری کی گئی تو کسی ایک نے بھی یہ نہیں کہا کہ ہتھیار ڈال دو یا اسرائیل کو تسلیم کرلو۔

میں نے جنرل مشرف سے چار گھنٹے آرمی ہاؤس میں ملاقات کی ۔ ان کو سمجھایا کہ فوج کو ڈی سینٹرلائز کریں اور بلوچستان کے پہاڑوں میں ذخائر بنا ئیں ، سرنگیں بنائیں، وہاں فیکٹریاں لگائیں ۔ عجیب بات ہے کہ میری یہ نصیحت کسی طرح ایران نے سن لی حالانکہ میں نے ایران کو نہیں کی تھی۔ ایران نے یہی کام کیا کہ اپنی پوری فوج کو ڈی سینٹر لائز کر دیا۔ انہوں نے اکتیس کو رز بنائیں اور پورے ایران میں پہاڑوں کو کھود کھود کر زیر زمین سیکیورٹی کا پورا نظام بنایا اور اسلحہ ساز فیکٹریاں لگائیں۔ جنرل مشرف نے ہماری ایک بات مان لی کہ فوج کوڈی سینٹرلائز کر دیا۔ ناردرن کمانڈ ، سدرن کمانڈ سینٹرل کمانڈ ہمارے اس مشورے کے بعد بنی ہے۔ وہ بات ان کو پسند آئی ۔ ہم نے ان سے اس وقت کہا تھا کہ آپ جی ایچ کیو میں بیٹھ کر آنے والی جنگیں کنٹرول نہیں کر سکیں گے لہذا مختلف کمانڈ زبنائیں۔ ہر کمانڈ کے پاس خود مختارانہ طور پر جنگی فیصلے کرنے کا اختیار ہو، اپنی اپنی فوج ہو جو اپنے طور پر جنگ کو سنبھال سکے۔ ان کو یہ بات تو سمجھ آگئی لیکن سرنگیں کھودنے والی اور پہاڑوں میں فیکٹریاں بنانے والی بات سمجھ نہیں آئی۔ میں ایئر چیف کلیم سعادت سے بھی ملا۔ ان کو بھی سمجھایا۔ ان کو بھی بات سمجھ نہیں آئی ۔ ہمارا بہت بڑا نقصان ہو گیا۔ آپ نے دیکھا کس طریقے سے ایران کے ایئر بیسز پر کھلے حملے ہوئے۔ شاید اسی لئے ایران نے اپنی ایئر فورس کو بڑھانے پر کم توجہ مرکوز رکھی کہ اس کو پتا تھا کہ اب دور غیر روایتی جنگوں کا ہے اور اسرائیل اور امریکہ کے لیے ان کی فضائیہ کو تباہ کرنا بہت مشکل نہیں۔ ایران بھی اسرائیل کے تمام ایئر بیسز اور نظام کو تباہ کر رہا ہے۔ آپ دیکھ رہے ہیں کہ جنگ اب پھر سے ان کے انفراسٹرکچر پر آگئی ہے۔ ایران اسرائیل کے بجلی گھروں ، آئل ریفائنریز اور پانی صاف کرنے کے پلانٹس پر حملے کر رہا ہے۔ آپ سوچئے ، اگر اسرائیل کے پانی صاف کرنے کے پلانٹ تباہ ہو جاتے ہیں تو پھر آپ کو اسرائیل کے خلاف جنگ کرنے کی ضرورت ہی نہیں ہے۔ یہ یہودی بھو کے پیا سے مرجائیں گے۔ اسرائیل بھی ایران کے ساتھ یہی کچھ کر رہا ہے۔ وہ بھی ایران کے پانی کے ذخائر اور بجلی گھروں کو نشانہ بنارہا ہے۔ سوچیں اگر پورا ایران گھپ اندھیرے میں چلا جائے، پھر ایران کیا جنگ کر سکے گا۔ کیوبا دنیا کا واحد ملک ہے جس میں پچھلے دو مہینے سے بجلی نہیں ہے۔ امریکہ تجربہ کر کے دیکھ رہا ہے کہ اگر وہ کیوبا کی تیل کی سپلائی روک دے، جو کہ اس نے روکی ہوئی ہے، تو پھر کیوبا کیسے بجلی بنائے گا، کتنے عرصے کے بعد فسادات ہوں گے قتل و غارت ہوگی، حکومت کا تختہ الٹے گا۔ وہ دیکھنا چاہتا ہے کہ بغیر گولی چلائے ، صرف پورے ملک میں بلیک آؤٹ کر کے وہ کیا تباہی مچا سکتا ہے۔ اب جنگیں بدل چکی ہیں ؛ جنگوں کے اصول بدل چکے ہیں۔ اب جنگوں کا مزاج اور معیار بالکل تبدیل ہو چکا ہے۔ اب بھارت کے ساتھ ہماری جو جنگ ہوگی ، اس میں بھارت وہی ہتھکنڈے استعمال کرے گا جو ایران اور اسرائیل ایک دوسرے کے خلاف استعمال کر رہے ہیں۔ بھارت نے یوکرین سے بھی سیکھا ہے۔ وہ نئے دور کے تقاضوں کے مطابق اپنی حکمت عملی کو تبدیل کر رہے ہیں اور ان کو آزما رہے ہیں۔ پوری دنیا میں تیل کی قلت اور بڑھتی ہے ہوئی قیمتوں کے باوجود بھارتی فوجوں نے اپنی جنگی مشقیں نہیں روکیں ۔ جبکہ ہم نے اپنے ملک میں سمارٹ لاک ڈاؤن لگا لیا اور فوجی نقل و حرکت بھی محدود کر دی تا کہ پٹرول بچایا جا سکے۔ بھارت نے ڈرون وار فیئر پر بہت زیادہ کام کیا ، انہوں نے یوکرین اور روس کی جنگ سے سیکھا ہے۔ ابھی تازہ رپورٹ کے مطابق بھارت دو ارب ڈالر صرف ڈرون پر سرمایہ کاری کر رہا ہے۔ دوسری طرف ہم نے اپنی قوم کی نظریاتی اور روحانی تربیت بھی نہیں کی۔ پوری قوم غافل ہے۔ کہیں ناچ گانے کی محفلیں ہو رہی ہیں، کہیں کرکٹ کھیلی جارہی ہے، کہیں بسنت منائی جارہی ہے، قومیت ، لسانیت، فرقہ واریت ہے۔ ہماری قوم ایک متحد قوم نہیں ہے۔ اور نفسیاتی اور روحانی طور پر اتنی کمزور ہے کہ اگر بجلی کا بل زیادہ آجائے تو خود کشی کر لیتے ہیں۔ سوچیں اگر کل بھارت کے ساتھ ممکنہ جنگ میں پاکستان کے گرڈ اسٹیشنز ، کمیونیکیشن ٹاورز، تیل کے ذخیرے تباہ ہو جائیں تو یہ قوم کیسے ان سہولیات کے بغیر گزارہ کر سکے گی ۔ ان سے اگر فون چھین لیا جائے، یا کچھ دیر کے لیے نیٹ بند کر دیا جائے تو ان کو ہسٹیریا ہو جاتا ہے۔