عايز تتعرف على المصريين؟ تعالى أقولك…" أول ما تحط رجلك في أي مكان فيه مصريين.. هتسمع الجملة دي: "اتفضل يا باشا.. الدنيا منورة بيك".. بس متنخدعش… ده الترحيب.. مش الحقيقة. المصري مش بني آدم.. المصري مزيج جينات بين تمساح في النيل.. وعراف في الحسين..وفيلسوف قاعد على القهوة بيقلب في رزقه.. وبيفتي في كل حاجة من أول الاقتصاد لحد معنى الحياة. المصري يضحك وهو بيعيط… يقولك.."الحمد لله يا عم.. ماشية بالعافية" وهو أصلاً بيطبخ العدس من غير عدس.. عايز تعرف المصري؟ بص عليه لما الكهربا تقطع.. هيقوم يقوم يشغل المروحة.. لما تسأله: "إزاي؟" يقولك: "مانا وصلتها على خط العمارة اللي جنبنا… دول عندهم فواتير مدفوعة".. المصري لما ييجي يشتم حد.. يبدأ بآية قرآنية: "ولا تنابزوا بالألقاب.. بس بصراحة أنت ما تتسكتلكش" المصري عنده منطق خاص في كل حاجة: في الحب.."أنا بسيبها عشان بحبها".. في الغلاء.."الأسعار نار؟ أشتري اتنين بدل واحد عشان ألحق قبل ما يزيد"… في السياسة.."أنا مليش دعوة..بس اللي بيحصل غلط طبعا".. والمصري مايعرفش يستسلم.. حتى لو الدنيا بتضربه بالجزم. يصحى الصبح..يشتغل في شركة.. بعد الظهر يركب توك توك..بالليل بيسجل فيديو على التيك توك..وقبل ما ينام.. يحط خطة لتربية البط فوق السطوح.. بس أوعى تفتكره سهل. المصري صبور بس مش غبي.. طيب بس مش أطرش.. عفوي بس حاسبها كويس. ولو اتزنق.. هيضحكلك ويقولك.."هات كوباية شاي ونتفاهم".. في النهاية.. لو عايز تتعرف على المصريين… تعالى اقعد معاهم ساعة.. هتحبهم… بس اقعد معاهم يوم.. هتدخل مستشفى أعصاب ولو عشت معاهم سنة؟ هتكتشف إنك واحد منهم… غصب عنك..😂 #يوميات_كاتب_ساخر ١ #يوميات_طبيب_نفسي ١

هل في جزء من شخصيتك اختفى بعد الجواز؟

لو ابنك سألك: إيه أهم شرط قبل الجواز؟ هترد عليه بإيه؟

هل الراجل بيتغير نفسيا بعد الجواز؟ وإزاي؟

بعد كل السنين دي.. إيه أكتر حاجة اتغيرت في نظرتك للجواز؟

دايما فيه سؤال بيتكرر -الخيانة الزوجية.. هل بتبدا من لحظة ولا من سنين؟ لما بنسمع كلمة خيانة.. اغلب الناس بتفكر في اللحظة اللي حصل فيها الفعل نفسه.. لكن الطب النفسي بيشوف الموضوع بشكل مختلف شوية. الطبيب النفسي مش بيسال مين غلطان الاول.. قد ما بيسال: -ايه اللي وصل الانسان للنقطة دي؟ في ناس كتير متخيلة ان الخيانة بتحصل فجاة.. لكن الحقيقة ان اغلب الحالات بيكون قبلها مشاعر ومواقف وتراكمات ممكن تكون استمرت شهور او سنين. ومن اكتر العوامل المشتركة اللي بتظهر في حالات الخيانة الزوجية احساس مستمر بالاهمال العاطفي.. غياب الحوار والتواصل بين الزوجين.. البحث عن التقدير والاهتمام من شخص تاني.. الرغبة في الهروب من مشاكل الحياة الزوجية.. الاندفاع وضعف السيطرة على الرغبات.. الانتقام بعد خلافات او جروح نفسية قديمة.. الشعور بالوحدة رغم وجود شريك حياة.. لكن هل الخيانة بتكون متوارثة؟ علميا لا.. مفيش حاجة اسمها جين للخيانة.. ممكن بعض الناس يبقى عندها صفات شخصية موروثة زي حب المغامرة او الاندفاع.. لكن ده مش معناه ابدا انها هتخون. لان في النهاية القرار قرار انسان.. مش قرار جينات. #العياده الطبيب: -امتى حسيتي ان في مشكلة في جوازك؟ الزوجة: -من سنين.. كنت حاسة اني عايشة مع شخص موجود جسديا بس مش موجود معايا نفسيا. الطبيب: -كان بيعاملك وحش؟ الزوجة: -لا.. كان بيوفر البيت وكل حاجة.. بس عمري ما حسيت ان حد سامعني. الطبيب: -وامتى دخل شخص تاني حياتك؟ الزوجة: -في وقت كنت حاسة فيه بوحدة شديدة.. كل اللي عمله انه سمعني. الطبيب: -يعني الموضوع مبداش حب؟ الزوجة: -لا.. ابتدا باهتمام الطبيب: -ولما العلاقة بدات تتطور.. مفكرتيش ترجعي؟ الزوجة: -فكرت كتير.. وكل مرة كنت اقول لنفسي اني مظلومة وان اللي بعمله له مبرر.. الطبيب: -ودلوقتي شايفة ايه؟ الزوجة: -شايفة ان الاهمال ممكن يفسر اللي حصل.. لكنه ما يبرروش.. الطبيب: -ودي نقطة مهمة جدا.. الطب النفسي بيفهم الاسباب لكنه ما بيلغيش المسؤولية.. ممكن نفهم ليه الانسان وقع في الغلط.. لكن ده ما يحولش الغلط لصح.. الحقيقة اللي ناس كتير مش بتحب تسمعها.. ان الخيانة نادرا ما بتكون نتيجة لحظة ضعف واحدة.. وغالبا بتكون نتيجة طريق طويل من المشاعر والاختيارات والقرارات. والاهم من كده.. ان اغلب الناس بيكون قدامها فرص كتير تتراجع قبل ما توصل للنهاية. عشان كده العلاج الحقيقي مش بس اننا نسال -مين خان؟ لكن كمان نسال -ايه اللي حصل في الطريق وخلى العلاقة توصل لكده؟ #يوميات_طبيب_نفسي #قصه_قصيره

بين حق الدولة وحق المغترب.. هل تحتاج بعض القوانين إلى مراجعة؟ لا أحد يستطيع أن ينكر حجم التغييرات التي شهدتها مصر خلال السنوات الماضية.. سواء في البنية التحتية أو التشريعات أو المشروعات القومية. وكثير من هذه القرارات كان الهدف منها إصلاح أوضاع استمرت لعقود طويلة. ومن بين القوانين التي أثارت جدلا واسعا .. القوانين المنظمة لإجازات العاملين بالجهاز الإداري للدولة والمسافرين للعمل بالخارج. فلسفة القانون كانت واضحة" الوظيفة الحكومية ليست مقعدا يُترك شاغرا لسنوات طويلة.. بينما تحتاج الجهات الحكومية إلى كوادر تعمل وتؤدي دورها" لذلك رحب البعض بالقانون.. خاصة من كانوا يرغبون في إنهاء ارتباطهم بالوظيفة الحكومية والانطلاق إلى فرص عمل أفضل خارج البلاد. لكن في المقابل.. هناك فئة أخرى تضررت من تطبيق القانون وهم المصريون الذين سافروا للعمل بالخارج واستمروا في سداد التزاماتهم وتأميناتهم وكانوا يعتبرون أنفسهم في إجازة قانونية وليسوا مستقيلين من وظائفهم. بعض هؤلاء واجه ظروفا استثنائية لم تكن في الحسبان مثل جائحة كورونا وتعطل حركة الطيران والإجراءات الاحترازية التي منعت الكثيرين من العودة في المواعيد المحددة. وآخرون استقروا لفترات طويلة بالخارج ثم أرادوا العودة إلى وطنهم حاملين خبرات علمية ومهنية كبيرة ليجدوا أن الطريق إلى وظائفهم القديمة أصبح مغلقا. السؤال هنا ليس: -هل كان القانون صحيحا أم خاطئا؟ السؤال الأهم: -هل توجد مساحة لمراجعة بعض الحالات الاستثنائية؟ فالدول الناجحة لا تستفيد فقط من أبنائها داخل حدودها.. بل تستفيد أيضا من خبراتهم التي يكتسبونها في الخارج. والطبيب الذي عمل سنوات في مستشفيات متقدمة.. أو المهندس الذي شارك في مشروعات عالمية.. أو الإداري والمحاسب الذي اكتسب خبرات دولية.. جميعهم يمثلون قيمة مضافة عند عودتهم إلى بلدهم. مصر عبر تاريخها كانت دائما تستفيد من أبنائها في الداخل والخارج. لذلك قد يكون من المفيد دراسة آليات تسمح بعودة بعض الكفاءات وفق ضوابط محددة.. تحقق مصلحة الدولة وتحافظ في الوقت نفسه على حق أصحاب الخبرات في خدمة وطنهم من جديد. فالقضية ليست صراعا بين الدولة والمواطن.. وليست معركة بين مؤيد ومعارض.. بل هي محاولة للوصول إلى توازن عادل بين احتياجات المؤسسات الحكومية.. وبين الحفاظ على الثروة الحقيقية لأي دولة "الإنسان وخبراته". قد تستطيع القوانين تنظيم العمل.. وقد تستطيع الحكومات تطوير المؤسسات.. لكن تبقى الخبرات البشرية هي الاستثمار الأهم.. لأنها وحدها القادرة على نقل المعرفة وبناء الأجيال القادمة. ولهذا فإن أي نقاش حول عودة المصريين العاملين بالخارج يجب أن ينطلق من سؤال واحد: -كيف نستفيد من خبراتهم لصالح الوطن.. بدلا من أن نفقدهم للأبد؟! #المصريين_بالخارج

خلوا بالكم من ولادكم.. اللى بيحصل دلوقتي مش هزار ولا مجرد تقليد منتشر بين المراهقين.. ده ممكن ينتهي بكارثة حقيقية. في العيادة جالنا مجموعة شباب وبنات في سن حوالي 15 سنة.. بعضهم كان في حالة ارتباك شديد.. هلوسة.. فقدان للتركيز.. وعدم إدراك للمكان أو الأشخاص اللي حواليهم. الأهل كانوا فاكرين إنها أزمة صحية مفاجئة.. لكن السبب كان تناول أدوية وعقاقير من غير إشراف طبي لمجرد التجربة أو التقليد. لا أدوية الاكتئاب ولا أدوية الفصام والذهان ولا المنشطات العصبية ولا المهدئات النفسية ينفع تتاخد من باب الفضول أو التجربة. الاستخدام الخاطئ لبعض العقاقير النفسية ممكن يسبب هلوسة سمعية أو بصرية اضطراب شديد في الوعي والإدراك فقدان مؤقت للذاكرة تشنجات عصبية هبوط حاد في الدورة الدموية اضطرابات خطيرة في ضربات القلب ضعف عام وفقدان الاتزان وفي بعض الحالات قد يصل الأمر إلى الغيبوبة أو الوفاة أدوية علاج الاكتئاب مثل مضادات الاكتئاب لا يتم تناولها إلا بعد تشخيص طبي ومتابعة مستمرة .. لأن الجرعة المناسبة لمريض قد تكون خطيرة على شخص سليم. راقبوا أولادكم واعرفوا بيتفرجوا على إيه وبيقلدوا مين وبيجيبوا الأدوية منين. دقيقة فضول أو تقليد ممكن تكلف إنسان صحته أو حياته كلها. الخلاصه ؛ أكثر المجموعات الدوائية التي قد تسبب أعراضا خطيرة عند إساءة استخدامها تشمل مضادات الاكتئاب .. مضادات الذهان.. المهدئات والمنومات والمنشطات العصبية. أما المواد المخدرة غير المشروعة فقد تؤدي إلى اضطرابات بالذاكرة والإدراك والهلوسة والتشنجات بدرجات متفاوتة حسب النوع والجرعة.

مش كل مريض نفسي بيفقد الإدراك أو التمييز.. في الطب النفسي فيه فرق كبير بين شخص عنده اضطراب نفسي لكنه مدرك لأفعاله ونتائجها وبين شخص في حالة ذهانية حادة أفقدته القدرة على إدراك الواقع علميا المسؤولية الجنائية بتتأثر فقط لو ثبت أن الشخص وقت الفعل كان فاقدا للإدراك أو غير قادر على التمييز بين الصواب والخطأ بسبب مرض عقلي شديد مثل بعض حالات الذهان الحاد أو الهوس الشديد المصحوب بأعراض ذهانية أما الاكتئاب.. القلق.. اضطرابات الشخصية.. أو أغلب الاضطرابات النفسية الشائعة فلا تعني تلقائيا أن الشخص لا يعلم ما يفعل أو أنه غير مسؤول عن أفعاله لذلك مجرد وجود تشخيص نفسي لا يكفي للحكم.. وإنما يحتاج الأمر إلى تقييم نفسي شرعي يحدد -هل كان الشخص وقت الواقعة مدركا لطبيعة فعله وعواقبه أم لا؟ ومن الناحية الطبية النفسية المرض النفسي Mental Illness لا يساوي فقدان العقل الذهان Psychosis قد يسبب فقدان الاتصال بالواقع في بعض الحالات القدرة على التمييز والحكم على الأمور Insight & Judgment هي المعيار الأساسي الذي يقيمه الأطباء النفسيون الشرعيون بالتالي لا يمكن علميا القول إن أي شخص حرق علم بلده لأنه "مريض نفسي" ..إلا بعد تشخيص وتقييم متخصص يثبت مدى إدراكه وتمييزه وقت الواقعة

محتاج اشتغل طبال محتاج اشتغل رقاص محتاج اشتغل نفسي عشان لقمة عيش محتاج اكون كذاب محتاج اكون أفاق محتاج اكون بسبع أرواح عشان أنجي بنفسي محتاج أبيع مبادئي وأضحك وسط الجراح وأقول للدنيا حاضر حتى لو قلبي استراح محتاج ألبس ألف وش وأغير لون الكلام وأصقف للغلط ساعات وأقول عليه تمام محتاج أمشي في الزحام من غير ما أسأل ليه وأجري ورا أي باب حتى لو رايح لتيه بس كل ما أبص لنفسي ألقى السؤال بيزيد هو الرزق عايز تمثيل؟ ولا إحنا ضيعنا الطريق؟ بس كل ما أبص للمراية أشوف واحد مش أنا كسبان لقمة عيش يمكن وخسر نفسه في الثمن. وعجبي

في علم النفس فيه مفهوم اسمه " الارتباط العاطفي القوي" .. وده أحيانا بيخلي الإنسان يعيد ترتيب أولوياته كلها من أجل شخص واحد. فيه ناس غيرت بلدها وفيه ناس غيرت نمط حياتها وفيه ناس غيرت معتقداتها وقناعات كانت فاكرة إنها مستحيل تتغير. السؤال الغريب هنا هل الدين هو اللي بيحدد طبيعة العلاقة؟ ولا العلاقة أحيانا بتكون أقوى لدرجة إنها تدفع الإنسان لإعادة النظر في كل شيء حتى معتقداته؟ رجل ترك لبنان وسافر إلى العراق من أجل امرأة أحبها وغير دينه ليتزوجها .. واااو البعض هيشوف القصة انتصارا للحب .. والبعض هيشوفها انتصارا للقناعة الجديدة .. لكن المؤكد أن المشاعر الإنسانية أعقد بكتير من أي تفسير بسيط.. الحب لا يعرف الحدود الجغرافية.. لكن السؤال الأصعب هل الحب يغير القناعات؟ أم أن القناعات الجديدة هي التي تمنح الحب طريقا للاستمتاع ؟

زمان كان لينا شغف حقيقي بمعرفة رجال ونساء المجتمع .. كنا بنقرأ عن إنجازاتهم وأخبارهم لأنهم وصلوا لمكانتهم بجهد وإنجاز واضح.. وكان اللي بيظهر لنا هو الجانب العام من حياتهم فقط.. أما تفاصيل حياتهم الشخصية فكانت بعيدة عن الأضواء. أما دلوقتي.. ومع انتشار السوشيال ميديا.. بقى أحيانا الظهور نفسه هو الهدف.. بقينا نسمع عن ناس بتدفع فلوس عشان تتصدر أغلفة المجلات أو تظهر في قوائم ومناسبات معينة.. وده خلى الناس تتساءل -هل الشهرة بقت نتيجة إنجاز.. ولا الإنجاز بقى مجرد وسيلة للشهرة؟ فاكر لما حصلت على أول درجة ماجستير ليا سنة 2008.. كان عندي صديق صحفي .. فرحان بيا أكتر مني وفوجئت إنه نشر خبر حصولي على الماجستير في إحدى المجلات.. وقتها استغربت.. خصوصا إني مش عايش وقتها في مصر .. لكنه كان عايز يشاركني فرحة نجاح جاء بعد سنوات من التعب والغربة والدراسة.. الفرق إن النشر وقتها كان احتفاء بإنجاز تحقق بالفعل.. مش محاولة لصناعة إنجاز على الورق. عشان كده الناس زمان كانت بتبحث عن أصحاب الإنجازات.. أما النهارده أحيانا بقينا نبحث عن حقيقة بعض المشاهير.. وهل الشهرة سبقت الإنجاز أم الإنجاز هو اللي صنع الشهرة.

-اكتشفت … ثم اكتئبت بقينا عايشين في زمن غريب شوية… زمن كل ما الواحد يكتشف فيه حقيقة جديدة.. يحس في الأول إنه لقى النجاة.. وبعدها بفترة يكتشف إن الحقيقة دي نفسها كانت بداية موجة جديدة من الحزن والاحباط. تكتشف إن مش كل الناس اللي حواليك بتحبك زي ما كنت فاكر… تكتئب. تكتشف إن الشغل اللي كنت معتبره حلم عمرك مجرد وسيلة عشان تدفع الفواتير… تكتئب. تكتشف إن البيت اللي كنت فاكره مصدر الامان فيه مشاكل وخلافات وضغوط اكتر مما كنت متخيل… تكتئب. وتبقى الصدمة الأكبر لما تكتشف إن الشخص اللي كنت بترسم معاه مستقبلك.. واللي كنت فاكر إنه هيسندك في الطريق.. هو نفسه ممكن يكون مصدر وجعك أو خيبتك. المشكلة مش في الاكتشاف نفسه. المشكلة إننا ساعات بنبني توقعات ضخمة جدا عن الاشخاص والاماكن والاحلام.. ولما الحقيقة تظهر قدامنا بشكل مختلف.. بنحس إن الدنيا كلها انهارت. لكن الحقيقة اللي ناس كتير بتغفل عنها إن الاكتشاف مش نهاية الطريق… الاكتشاف هو بداية الفهم. كل حقيقة مؤلمة بتكشفلك شخص على حقيقته.. او وضع لازم يتغير.. او طريق مش مناسب ليك. ايوه.. بعض الاكتشافات بتوجع وبعضها بيدخلنا في حالة حزن طويلة.. لكن من غيرها كنا هنفضل عايشين في اوهام ممكن تضيع عمر كامل. يمكن الاكتئاب الحقيقي مش إنك تكتشف الحقيقة… يمكن الاكتئاب الحقيقي إنك تعرف الحقيقة وتقرر تنكرها وتعيش كأنك ما شفتهاش. عشان كده.. مش كل وجع بعد اكتشاف يبقى خسارة. في وجع بيكسر الانسان… وفي وجع بيفوقه. #اكتئاب

نمط التعلق التجنبي (Avoidant Attachment Style) .. غالبا بيكون مرتبط بتجارب سابقة أو طريقة التربية أو علاقات مؤلمة مر بيها.. لكن برضه مش كل راجل بيبعد أو بيتردد يبقى تجنبي.. ومش كل تصرف نعلقه على مصطلحات السوشيال ميديا. في الآخر الحب الصحي بيبان في الأفعال والاستقرار والالتزام.. مش في المطاردة والجذب المستمر السوشيال ميديا أحيانا بتصور التجنبي كأنه عاشق مجنون بيهرب من حبه.. بينما الواقع النفسي أكثر تعقيدا.. وليس كل انسحاب أو برود عاطفي يعتبر "تجنبيا"

عند استخدام الإستروجين كعلاج للنزيف الحاد.. فيكون الهدف رفع مستوى الإستروجين مؤقتا لتثبيت بطانة الرحم وإيقاف النزيف.. وليس خفضه.. انا كمان وقعت في نفس الخطأ ..عشان كده بعتذر .. أنا كمان بتكلم في تخصص مش تخصصي "أنا طبيب نفسي".. مش طبيب امراض النساء والولادة.. -بس انت خريج طب واستاذ جامعي من حقك تتكلم ولا انت مش فاكر اللى درسته ؟! -مش فاكر طبعا .. هو عشان أنا استاذ جامعه وخريج طب ابقي فاهم في كله .. يا راجل !! -طيب حاول تفتكر كده معايا .. هات ودنك .. احسن هيقولوا عليك طبيب مش فاهم .. انطق الله يخرب بيتك .. -يا عم أنا طبيب نفسي .. مش خريج زراعه -هتنطق ولااااا -تمام اللى أنا فاكره .. في كلاس النسا زمان كان يا سيدى كالاتى .. -كلاس !! -بهزر معاك .. المهم ان الأمر ده بيعتمد على سبب النزيف.. لكن بشكل عام انخفاض الإستروجين قد يؤدي إلى عدم استقرار بطانة الرحم وحدوث نزيف أو تبقيع بين الدورات .. الارتفاع أو التقلب الشديد في الإستروجين قد يؤدي إلى زيادة سماكة بطانة الرحم.. ثم حدوث نزيف غير منتظم أو غزير عند سقوط هذه البطانة. لذلك ليس صحيحا أن النزيف يحدث فقط بسبب زيادة الهرمون أو فقط بسبب نقصه.. كلا الحالتين قد تسببان نزيفا.. لكن بآليات مختلفة. -يعني ايه تبقيع بطانه الرحم دى كمان .. -هو انت مش اخصائي تغذيه وفاهم انت ؟! -ايوه .. بس انت دكتور نفسي وفاهم اكتر مني -والله .. بطل استهبال الخلاصه .. التبقيع بين الدورات هو نزول نقاط أو كميات بسيطة من الدم خارج موعد الدورة الشهرية الطبيعي. يعني مثلا: الدورة انتهت.. وبعد أسبوع نزلت بضع قطرات دم أو إفرازات بنية. أو قبل موعد الدورة بأيام ظهر نزيف خفيف جدا لا يشبه الدورة المعتادة.. -وبعدين ؟ -أنا كده خلصت .. ارجع للطبيب المختص واللى فاهم اكتر منى ومنها ومنك يكون افضل ..

#تعفن_الدماغ ملاحظة علمية.. لا يوجد في المراجع الطبية النفسية تشخيص رسمي اسمه (تعفن الدماغ).. لكنه يستخدم شعبيا للإشارة إلى اثار الإفراط في المحتوى الرقمي على الانتباه والتركيز والسلوك. #العياده في يوم من الأيام.. مجموعة شباب وبنات اتفقوا إنهم يروحوا لعيادة نفسية بعد ما لاحظوا إن حياتهم اتغيرت بشكل غريب. دخلوا عند الطبيب النفسي.. وقعدوا قدامه. الشاب الأول قال: -يا دكتور.. بقيت أقضي ساعات طويلة على السوشيال ميديا.. بفضل أقلب في الفيديوهات القصيرة.. ومش قادر أركز في شغلي أكتر من دقايق البنت الأولى قالت: -أنا بقيت زهقانة من أي حاجة طبيعية.. لازم كل دقيقة أمسك الموبايل.. حتى لو قاعدة مع أهلي أو صحابي شاب تاني قال: -أنا بقيت أبدأ عشر حاجات ومكملش ولا حاجة.. تركيزي ضايع ومش قادر أقرأ صفحتين على بعض ابتسم الطبيب وقال: -أول حاجة لازم نعرفها إن مصطلح تعفن الدماغ مش مرض نفسي رسمي.. لكنه وصف لحالة بقت منتشرة بسبب الإفراط في استهلاك المحتوى السريع والمثير ثم بدأ الطبيب يعمل مجموعة من الاختبارات النفسية والمعرفية. بعد التقييم.. ظهرت النتائج. الطبيب: -معظمكم عنده أعراض مشتركة.. منها ضعف الانتباه والتركيز انخفاض القدرة على الصبر وتأجيل المتعة التشتت المستمر الاعتماد الزائد على التحفيز السريع القلق عند الابتعاد عن الهاتف اضطراب النوم بسبب الاستخدام المفرط للشاشات انخفاض القدرة على القراءة أو التعلم لفترات طويلة. البنت الثانية سألت: -يعني إحنا مرضى نفسيين؟ رد الطبيب: -لا.. مش بالضرورة.. لكن فيه أنماط سلوكية محتاجة تعديل قبل ما تتحول لمشاكل أكبر وسأل شاب آخر: -إيه التشخيص العلمي للحالة دي؟ قال الطبيب: -علمياً ممكن تظهر في صورة - إدمان سلوكي رقمي (Behavioral Addiction) وهو التعلق المفرط بالموبايل أو السوشيال ميديا لدرجة التأثير على الحياة اليومية - ضعف التحكم التنفيذي للمخ يعني صعوبة تنظيم الوقت والتركيز واتخاذ القرارات - انخفاض مدى الانتباه (Reduced Attention Span) وده بيخلي الشخص ينتقل بسرعة من موضوع للتاني بدون تركيز عميق - القلق المرتبط بفقدان الاتصال الرقمي وهو التوتر الشديد عند الابتعاد عن الهاتف أو الإنترنت - اضطرابات النوم الناتجة عن الشاشات بسبب التعرض المستمر للضوء والمحتوى المحفز قبل النوم سألت إحدى البنات: -طيب العلاج إيه؟ قال الطبيب: -العلاج بيبدأ من تغيير العادات اليومية تحديد ساعات لاستخدام السوشيال ميديا.. إغلاق الإشعارات غير المهمة.. ممارسة الرياضة يوميا.. تخصيص وقت للقراءة.. النوم المنتظم.. قضاء وقت حقيقي مع الأسرة والأصدقاء.. تدريب المخ على التركيز التدريجي بعيداً عن الشاشات وفي نهاية الجلسة قال الطبيب: -المشكلة مش في التكنولوجيا نفسها.. المشكلة لما تبقى هي المتحكم في وقتنا وتفكيرنا.. العقل زي العضلة.. كل ما تدربه على التركيز والتعلم هيقوى.. وكل ما تدربه على التشتت هيبقى التشتت أسلوب حياته خرج الشباب والبنات من العيادة وهم فاهمين إن الحل مش في الهروب من التكنولوجيا.. لكن في استخدامها بشكل متوازن يحافظ على صحة العقل #قصه_قصيره

شهدت مواقع التواصل الاجتماعي خلال الأيام الماضية حالة من الجدل بعد تداول أخبار القبض على "وليد مسعود الغنيمي" .. مع انتشار روايات كثيرة بعضها مؤكد وبعضها لا يزال مجرد معلومات متداولة. ولأن الهدف هو التوعية وليس التشهير.. فمن المهم عرض الوقائع المنشورة بحذر وموضوعية. ملخص القضية في نقاط • صدر حكم غيابي بالسجن 10 سنوات في قضية تتعلق "بتزوير محررات رسمية وانتحال صفة مهنية ".. وفق ما نشرته وسائل إعلام نقلت تفاصيل القضية. • أوراق القضية المنشورة إعلاميا ذكرت أن المتهم قام باستخراج عدة بطاقات رقم قومي خلال سنوات مختلفة ببيانات مهنية غير صحيحة. • البيانات المثبتة في بعض المستندات كانت تشير إلى أنه عضو هيئة تدريس أو يعمل بقسم جراحات القلب في جامعة عين شمس. • التحقيقات المنشورة أشارت إلى أن الجهات المختصة "راجعت تلك البيانات وتبين عدم صحتها". • المكاتبات الرسمية المتداولة في القضية أفادت بأن الشخص المذكور "ليس مقيدا بنقابة الأطباء "وليس عضوا بهيئة التدريس بكلية الطب جامعة عين شمس. • تم القبض عليه مؤخرا لتنفيذ الحكم الصادر بحقه بحسب ما نشرته وسائل الإعلام. نقطة مهمة جدا حتى الآن فإن جوهر القضية المنشور يتعلق "بتزوير محررات رسمية وانتحال صفات مهنية وأكاديمية". أما ما يتم تداوله على مواقع التواصل من أنه أجرى عمليات قلب مفتوح أو مارس جراحة القلب لسنوات أو تسبب في أضرار لمرضى .. فهذه أمور تحتاج إلى أدلة وأحكام ووثائق رسمية مستقلة .. ولا يكفي تداولها على الإنترنت لاعتبارها حقائق مؤكدة. لماذا يجب الحذر في تداول الأخبار؟ لأن التوسع في نشر معلومات غير مثبتة قد يسبب عدة مشكلات: • الإساءة إلى سمعة الأطباء المصريين دون دليل. • إثارة الذعر بين المرضى وأسرهم. • الإضرار بصورة المؤسسات الطبية والجامعات المصرية. • الخلط بين ما هو ثابت في أوراق القضايا وما هو مجرد روايات متداولة على مواقع التواصل. الرسالة الأهم إذا ثبتت وقائع التزوير فهي مسؤولية فردية تخص صاحبها ولا يمكن تعميمها على آلاف الأطباء المصريين الذين يعملون داخل مصر وخارجها بكفاءة ومهنية عالية. كما أن احترام القضاء يقتضي انتظار الأحكام النهائية والاعتماد على البيانات الرسمية.. لا على المنشورات المتداولة أو المبالغات التي تنتشر على السوشيال ميديا. الوعي الحقيقي لا يكون بتضخيم الأخبار وإنما بالتمييز بين الوقائع المثبتة والشائعات .. وبين المسؤولية الفردية وسمعة مهنة كالطب . المعلومات الواردة أعلاه مستندة إلى ما نُشر عن القضية والحكم والتحقيقات المتداولة إعلاميا .. مع التأكيد أن بعض الادعاءات المنتشرة على مواقع التواصل بشأن ممارسته الفعلية لجراحة القلب أو حجم نشاطه المهني لا توجد لها في المصادر المتاحة أحكام أو وثائق رسمية منشورة تثبتها بشكل قاطع.

"موضوع القوامه فى الاديان السماويه مش مجرد فلوس وإنفاق وبس.. لكنه مسئوليه وواجب ومحاسبه. فى الاسلام: القرآن قال (الرجال قوامون على النساء بما فضل الله بعضهم على بعض وبما انفقوا من اموالهم) النساء يعنى الانفاق سبب من اسباب القوامه.. لكن القوامه نفسها مسئوليه اداره ورعايه وحمايه للاسره.. وليست تسلطا ولا استبدادا. وفى المسيحيه: جاء فى رسالة بولس الى اهل افسس (لان الرجل هو راس المراه كما ان المسيح ايضا راس الكنيسه) افسس وفى نفس الاصحاح طلب من الرجل ان يحب زوجته كما احب المسيح الكنيسه وبذل نفسه لاجلها.. يعنى القياده مرتبطة بالتضحيه والخدمه مش بمجرد الانفاق. وفى اليهوديه: جاء فى سفر التكوين "ان الرجل يترك اباه وامه ويلتصق بامراته ويكونان جسدا واحدا" التكوين والتراث اليهودى حمل الزوج مسئولية اعالة البيت ورعايته وحمايته. لكن السؤال الحقيقى: لو راجل بطل يصرف لعذر مرض او بطاله او ظرف مؤقت.. هل يبقى فقد كل مكانته داخل بيته؟ ولو ست صرفت فتره على بيتها.. هل بقت هى الزوج وهو الزوجه؟ العلاقه الزوجيه اكبر من كشف حساب بنكى.. القياده مسئوليه.. والانفاق واجب.. والاحترام متبادل. انما لو راجل قادر وممتنع عن الانفاق عمدا.. فهنا بيكون مقصر فى واجبه الشرعى والاخلاقى.. وده موضوع مختلف تماما عن سقوط القوامه بمعناها الكامل. اختزال القوامه كلها فى الفلوس فهم ناقص للمساله فى الاسلام والمسيحيه واليهوديه على حد سواء. تغيير قواعد المجتمع بيسبب امراض نفسيه . استقيموا يرحمكم الله .

يمكن بتناول الحالة من منظور نفسي .. لكن من المهم عدم تصوير ما تمر به الطفلة على أنه "حب حقيقي" بالمعنى الناضج .. بل كارتباط عاطفي مبكر يحدث أحيانا في مرحلة المراهقة المبكرة ويكون تأثيره كبيرا على الطفل بسبب عدم اكتمال النضج الانفعالي والعقلي.. #العياده في العيادة النفسية جاتلي بنت عندها 12 سنة.. كانت قاعدة ساكتة ومش بتتكلم كتير وباين عليها الحزن والتعب النفسي. سألتها: انتي في سنة كام؟ قالت: أولى إعدادي سألتها تاني: مالك؟ قالت بعد تردد: مش عارفة… بس من ساعة ما زميل ليا في الدرس بعد عني وأنا مش كويسة الحقيقة إن ناس كتير ممكن تضحك على الكلام ده وتقول: "دي لسه طفلة" بس الطب النفسي بيقول غير كده. في السن ده الطفل أو الطفلة بيبدأوا يدخلوا مرحلة اسمها المراهقة المبكرة ودي مرحلة بيحصل فيها تغيرات نفسية وعاطفية كبيرة جدا. البنت دي شافت ولد معاها في الدرس.. في الأول كان مجرد زميل عادي. بعد شوية بقت تستنى تشوفه. تفرح لما يدخل. وتضايق لو غاب. وتستنى أي كلمة أو اهتمام منه. وده اللي بنسميه في علم النفس "التعلق العاطفي المبكر" المشكلة إن أول مشاعر بتحصل في العمر ده بتبقى قوية جدا. مش لأنها أكبر حب في الدنيا. لكن لأنها أول مرة القلب والعقل يجربوا الإحساس ده. البنت دي بدأت تربط يومها كله بالشخص ده. لو كلمها تبقى مبسوطة. لو تجاهلها تزعل. لو بص لها تفرح. ولو بعد عنها تحس إن الدنيا كلها بقت وحشة. ومع الوقت بدأت تظهر أعراض واضحة. بقت مش عايزة تاكل. مش عايزة تشرب. الأغاني اللي كانت بتحبها مبقتش تفرحها. اللعب مع إخواتها الصغيرين مبقاش له طعم. المذاكرة بقت تقيلة عليها. والمدرسة والدروس بقوا عبء كبير. في الطب النفسي بنسمي الحالة دي "فقدان الاستمتاع" يعني الحاجات اللي كانت بتبسط الإنسان مبقتش تفرحه زي الأول. كمان البنت دخلت في حاجة اسمها "الاجترار الفكري" وده معناه إنها بتفكر في نفس الموضوع طول الوقت. ليه بعد؟ ليه اتغير؟ هو زعلان مني؟ عملت ايه غلط؟ أسئلة كتير بتلف في دماغها بدون إجابات. ومع كثرة التفكير بيزيد الحزن والقلق. في السن ده الطفل بيبقى لسه معندوش خبرة عاطفية كفاية تخليه يفهم إن المشاعر بتتغير وإن الأشخاص مش لازم يفضلوا موجودين طول العمر. عشان كده بيحس إن المشكلة أكبر من حجمها الحقيقي. ولو الحالة دي استمرت فترة طويلة من غير احتواء أو دعم نفسي ممكن توصل الطفل إلى ضعف الثقة بالنفس. تراجع المستوى الدراسي. العزلة عن الأسرة والأصدقاء. القلق والتوتر المستمر. الاعتماد العاطفي على الآخرين. صعوبة تكوين علاقات صحية في المستقبل. لكن الخبر الحلو إن أغلب الحالات دي بتتحسن لما الطفل يلاقي احتواء وفهم من أهله. رسالة للبنت دي ولكل بنت في سنها المشاعر اللي جواكي حقيقية ومؤلمة بالنسبة ليكي ومحدش من حقه يستهين بيها. لكن لازم تعرفي إن سعادتك مش متعلقة بشخص واحد. انتي لسه في بداية حياتك. لسه قدامك أحلام ونجاحات وأصدقاء وتجارب كتير. واللي انتي حاسة بيه النهارده مش هيستمر بنفس القوة طول العمر. أما رسالتي للأب والأم: لو ابنك أو بنتك اتعلقوا بشخص في السن ده متسخروش منهم. ومتقولوش "دي عيال صغيرة" اسمعوا. اتكلموا معاهم. اقربوا منهم. راقبوا نومهم وأكلهم ومذاكرتهم. خلوهم يحسوا إن البيت هو المكان الآمن اللي يقدروا يحكوا فيه أي حاجة. لأن الطفل لما بيفقد الاحتواء جوه البيت .. بيدور عليه بره بأي شكل. وفي النهاية… مش كل تعلق عاطفي مرض. ومش كل حزن اكتئاب. لكن لما الحزن يبدأ ياخد من الطفل أكله وشربه وضحكته ومستقبله .. ساعتها لازم نقف ونفهم ونساعد قبل ما المشكلة تكبر. #يوميات_طبيب_نفسي لو محتاج استشاره مجانيه في اي وقت "أطفالنا اهم "