الشيئ اللافت هو إن ترامب عادة لما بيقابل أي رئيس بيلمح للحاجات اللي هو عايزها منه، إلا الرئيس السيسي، بيقعد يكلمه عن سد النهضة وإن أمريكا لازم تساعد مصر في الموضوع ده..

الفيديو ده حلو اوي حلو اوي فعلا.. الناس العادية في غزة عارفة بفطرتها مين وقف معاها بجد من غير متاجرة.. تحيا مصر.. دولة شريفة في زمن عز فيه الشرف 🇪🇬🇪🇬

الشهادة المتداولة عن مستشفى الشاطبي هي من نوعية الحاجات اللي ماينفعش تعدي خالص، ولازم يكون فيها تحقيق دقيق مايكتفيش بس بفكرة "عدم وجود أدلة"، لإن اللي كتبت الشهادة ممكن مايبقاش عندها دليل على اللي شافته، بس أي مؤسسة هتعرف توصل لحقيقة اللي بيحصل فيها بسهولة، وطبعا في حالة التأكد من إن الكلام غير صحيح فلازم يكون في إجراء قانوني ضد المدعية.. بس ده كلام مايعديش خالص وبيان جامعة إسكندرية خطوة أولى إيجابية وننتظر باقي الخطوات..

فلوس كتير جدا اتدفعت علشان تقنعك إن مصر فقدت مكانتها وتأثيرها.. لكن الحقيقة حاجة تانية

فخامة الرئيس السيسي في قمة الـG7

❤️🇪🇬

"مصر مركز إقليمي لتداول الطاقة" ماكرون قبل ساعات من انطلاق قمة الـG7 طرح فكرة مهمة جدا وهي إنشاء مسار بديل لنقل الغاز الطبيعي من الشرق الأوسط لأوروبا، بعيد عن مضيق هرمز.. الفكرة هي إن السعودية تنشئ خطوط أنابيب تعبر أراضيها وصولا للبحر الأحمر، ومن خلال مصر يتنقل الغاز للبحر المتوسط ومنه لأوروبا.. حتى الآن دي فكرة نظرية، وتنفيذها طبعا محتاج استثمارات ضخمة، لكن المهم هنا إن الكلام ده متسق تماما مع اللي مصر شغالة عليه من سنين، وهي إنها تبقى مركز إقليمي للطاقة "جون الغاز اللي جبناه وكانوا بيتريقوا عليه".. من يومين رئيس الوزراء كان بيتفقد محطة الإسالة في إدكو، وهناك كان في كلام عن الغاز القبرصي من حقل "كرونوس" اللي هيوصل خلال سنة ٢٠٢٨ علشان يتسيل ويُعاد تصديره.. مصر جابت الجون وبتستثمر في تطويره كمان.. والصورة الذهنية دي بتتثبت يوم عن يوم..

اوبببببببب

من قلب العاصمة الجديدة.. الحلم اللي اتحقق ❤️🇪🇬 المتحدة عاملة عظمة في الفان زون 🔥🔥

كل ما بقرا خبر عن مصنع جديد في المنطقة الاقتصادية لقناة السويس، وفي القنطرة غرب تحديدا، بنبسط جدا.. الطفرة اللي حصلت مذهلة! النهاردة اتوقع عقد إنشاء مصنع صيني جديد للمنسوجات، باستثمارات ٢٠ مليون دولار، وعلى مساحة ٦٠ ألف متر مربع، وهيوفر ٥٠٠ فرصة عمل مباشرة، و٧٠٪ من إنتاجه هيكون للتصدير.. القنطرة غرب حاليا بقت مركز مهم لصناعة الملابس والمسنوجات باستثمارات أكتر من مليار دولار.. قصة نجاح عظيمة بعد جهد سنين لتطوير المنطقة الاقتصادية لقناة السويس.. قصة بتأكد إن اللي يصبر ويتعب لازم يحصد..

العلاقات بين مصر والإمارات عصيّة تماما على كل محاولات الإفساد والتشويه اللي شغالة من ٣٠ يونيو ولحد النهاردة..

النهاردة كان في اجتماع للرئيس السيسي مع رئيس الوزراء ووزير الكهرباء، ومن ضمن المعلومات المهمة اللي تضمنها بيان الرئاسة، إن مصر بتستهدف توليد الكهرباء بنسبة ٤٥٪ من الطاقة الشمسية وطاقة الرياح، خلال سنتين.. الخطة دي في البداية خالص كانت ٤٢٪ سنة ٢٠٣٥، بعد كده بقت ٤٢٪ سنة ٢٠٣٠، وخلال الأسابيع الأخيرة تم ضغطها أكتر لـ٤٥٪ خلال سنتين يعني ٢٠٢٨.. التطورات دي لا يمكن فصلها عن الحرب وتداعياتها، وده معناه إن الدولة المصرية على الأرجح بتسرّع وبتضغط الخطة دي لأسباب متعلقة بالأمن القومي وتحديدا أمن الطاقة اللي بقى مهدد في العالم كله بسبب تداعيات الحرب وارتفاع أسعار النفط، وده شيء ممكن يتكرر في أي لحظة..

إلى أن يتضح تماما حقيقة اللي بيحصل، لكن حتى الآن السيناريو الحالي هو كابوس مرعب لمجرم الحرب نتنياهو، وطبعا مُتوقع انه يحاول بكل الطرق يفسد أي اتفاق.. خسرت إسرائيل في عهد نتنياهو مكانة دولية كانت لعشرات السنين لا تُمس، مع حالة استقطاب داخلي وتأزم مؤسسي هيظهر أكتر بعد انتهاء الحرب، وأي مكاسب تحققت -وهي مش قليلة بردو- كانت بسبب هدايا مجانية قدمها غباء الأطراف الأخرى.. منطقة منكوبة بالتطرف من كل شكل.. ربنا يريحنا منهم..

ماعنديش أي دليل على اللي هقوله، لكن عندي شك قوي في وجود انقلاب داخلي تم/ بيتم داخل النظام الإيراني حاليا.. اللي بيحصل مش طبيعي اوي رغم انه ظاهريا جيد جدا للمنطقة كلها.. وفي شواهد على مدار اليوم بتأكد إن في شيء غير اعتيادي بيحصل داخل أروقة النظام.. ربنا يستر وهنشوف اللي هيحصل..

خلال آخر أسبوعين بس، زاد إنتاج البترول من حقول الصحراء الغربية بحوالي ١٢ ألف برميل يوميا، وده من خلال ٥ آبار جديدة.. أخبار زيادة إنتاج البترول والغاز بتتكرر كتير آخر كام أسبوع، والسبب الرئيسي طبعا هو سداد مديونية الشركات الأجنبية، اللي خلى الاستكشاف والإنتاج يرجع تاني.. بس الأخبار دي، تقول لك ليه كان شغل المطاريد مكثف جدا من ٢٠٢٢ وطالع على الأزمة الاقتصادية.. هو كان خايف من اللحظة دي، لحظة ما تقوم وتقف على رجلك، فتخرج من الدوامة اللي كان عايزك تفضل فيها: تراكم مديونية، قلة إنتاج، اضطرار للاستيراد، ومع وجود أزمة دولار فماتعرفش تستورد فالكهرباء تقطع بالساعات والعربيات ماتلاقيش بنزين.. وهكذا.. وده في موضوع واحد، فما بالك ببقية المواضيع؟ وطبعا الهدف النهائي إن الناس تنزل تطربقها.. بس ربك بقى..

عايزك تتخيل لو واقعة زي سرقة معدات منتخب إنجلترا، حصلت في دورة رمضانية في مصر مش في أمريكا اللي بتستضيف كاس العالم.. كان هيتقال ايه؟ طبعا ده شيء وارد يحصل في أي دولة، بس لما أي حاجة واردة في أي دولة بتحصل في مصر، لازم تتحول لفضيحة ومكايدات وشرشحة، علشان تقتنع إن انت كمواطن عايش في مزبلة مش في بلد لحد ما تفقد الأمل وتنزل تطربقها.. بس الحقيقة، إن العالم الواقعي فيه حوادث من كل شكل ولون، والحقيقة بردو إن ترامب شخصيا لما جه مصر كان بيشيد بالحالة الأمنية وشايف إنها أحسن من الدولة اللي بيديرها كمان، فمن حقي ومن واجبي كمواطن إني أبروز ده من غير ما أي مختل يتهمني بالتطبيل، أو يطلع عليا عُقدة الخواجة اللي بتخليه يشوف كل حاجة برا مثالية.. اهي ماطلعتش مثالية.. اهدى بقى وعيش معانا على الكوكب!

منطقة حقول سيناء البحرية سجلت أعلى معدل إنتاج من ٢٠١٧: ٢٧ ألف برميل يوميا، وكمان ده أزيد بنسبة ٥٠٪ عن معدل الإنتاج في بداية ٢٠٢٥.. الزيادة التراكمية من وقتها لحد دلوقتي حوالي ٢.٨ مليون برميل.. المفاجأة إن الحقول دي عمرها حوالي ٦٠ سنة، يعني المفروض إنتاجها يقل مش يزيد، لكن اللي حصل العكس.. الشريك الأجنبي في الحفر والاستكشاف هو شركة إيني، واللي طبعا ليها نجاحات كتير في مصر، لكن لازم تربط الإنجاز ده بتصفية مديونية شركات البترول الأجنبية، بعد ما كانت وصلت لـ٦ مليار دولار في ٢٠٢٤.. ربنا يديم علينا فضله وكرمه، ولا عزاء لمن راهن على الخراب..

فيديو الأهالي اللي بيضربوا المُدرسة علشان منعت الغش في لجنة الامتحان -لو صحت الرواية- هو تجسيد مثالي للغباء والحمورية.. يعني انت يا مخ الشمبانزي بتضرب الست علشان منعت الغش، فبتعلم ابنك وهو لسه مادخلش دنيا إن السرقة حلال واللي يمنعك تسرق اضربه؟ يعني انت يا أغبى المخلوقات كل اللي فارق معاك إن ابنك يجيب درجة كويسة حتى لو ده مش مستواه الحقيقي وحتى لو هيفشل في حياته لإنه واخد حاجة مش من حقه؟ انت حرامي وبتربي حرامي، زي اللي بيسرق كهربا وزي اللي بينشل محفظة.. مفيش أي فرق بينكم جميعا الحقيقة!

ميسكي برهاني المدير الإقليمي بالبنك الدولي، بتزور مصر وقابلت وزير التخطيط، وخلال اللقاء أشادت بـ"الطفرة" اللي مصر حققتها في معدل الإنتاج الزراعي والتصدير للأسواق العالمية.. الطفرة دي بتحصل في دولة عندها فقر مائي "من غير أي سدود أصلا"، وعدد سكانها بيزيد، وفي نفس الوقت بتستصلح ملايين الأفدنة في الصحراء.. تجربة الزراعة والري في مصر آخر ١٠ سنين مظلومة جدا، لإنها فعلا تجربة تستحق تكون نموذج عالمي للاستفادة من كل نقطة مية بكفاءة مذهلة.. وطبعا مش محتاج أقول لك إن الطفرة اللي بتتكلم عنها المدير الإقليمي للبنك الدولي هي سبب التركيز والهجوم من إعلام المطاريد على جهاز مستقبل مصر في الفترة الأخيرة.. خلاص بقى معروف للعبة بتمشي ازاي..

إيرادات السياحة في مصر حققت ١٤.٤ مليار دولار من يوليو ٢٠٢٥ لمارس ٢٠٢٦، مقابل ١٢.٥ مليار دولار خلال نفس الفترة من ٢٠٢٤ - ٢٠٢٥.. رقم ماينفعش تفصله عن التطوير اللي بيحصل في المطارات، أو الزيادة اللي بتحصل في الغرف الفندقية، وطبعا طبعا عن افتتاح المتحف المصري الكبير، اللي كان بيتهاجم على اعتبار انه مالوش لازمة وكده "كالعادة"، فمصر هي أول دولة بتعمل حاجات مالهاش لازمة وبتجيب منها مليارات الدولارات!