அறந்தாங்கியைச் சேர்ந்த தங்கை பர்வீன்பானுவை கொடூரமாகக் கொன்ற கொலையாளிகளை விரைந்து கைது செய்ய வேண்டும்! @CMOTamilnadu @mkstalin புதுக்கோட்டை மாவட்டம் அறந்தாங்கி காரணியானேந்தலை சார்ந்த தங்கை பர்வீன்பானு கடந்த 14.07.2025 அன்று மாலை மேய்ச்சலுக்குச் சென்ற மாடுகளை வீட்டுக்கு அழைத்துவரச் சென்றவர், கொடூரமாகக் கொல்லப்பட்டுள்ள துயர நிகழ்வு அதிர்ச்சியும், மிகுந்த மனவேதனையும் அளிக்கிறது. கணவனை இழந்து, இரண்டு பெண் பிள்ளைகளுடன், கால்நடைகள் வளர்ப்பின் மூலம் கிடைத்த சொற்ப வருமானத்தில் வாழ்க்கையை நடத்திவந்த பர்வீன்பானுவை இழந்து, அவருடைய இரண்டு குழந்தைகள் தவித்து நிற்பது நெஞ்சைக் கனக்க செய்கிறது. திமுக ஆட்சியில் அடுத்தடுத்து நடந்துவரும் கொடூரக் கொலைகளும், பாலியல் வன்கொடுமைகளும் பெண்கள் பாதுகாப்பாக வெளியில் நடமாட முடியாத கொடுஞ்சூழலை ஏற்படுத்தியுள்ளது. கொலையாளிகளை அடையாளம் காண முடியாமல் திமுக அரசின் காவல்துறை திணறி வருவது, மிகப்பெரிய பெருங்கொடுமையாகும். ஆகவே, தங்கை பர்வீன்பானுவை கொன்ற கொலையாளிகளை விரைந்து கைது செய்து சட்டப்படி கடும் தண்டனை பெற்றுத்தர வேண்டுமென வலியுறுத்துகிறேன். மேலும், தாயை இழந்து கையறு நிலையில் தவிக்கும் தங்கை பர்வீன்பானுவின் மகள்கள் இருவருக்கும் அரசு வேலையும், உரிய துயர் துடைப்பு நிதியும் வழங்க வேண்டுமெனக் கேட்டுக்கொள்கிறேன். - செந்தமிழன் சீமான் தலைமை ஒருங்கிணைப்பாளர் நாம் தமிழர் கட்சி

தெய்வத்திருமகன் பசும்பொன் ஐயா முத்துராமலிங்கத்தேவர் குறித்து அவதூறுப் பேச்சு; தமிழ்த்தலைவர்களை எவர் இழிவுபடுத்தினாலும் ஏற்க முடியாது! மள்ளர் மீட்புக் களத்தின் நிறுவனத்தலைவர் செந்தில் மள்ளர் அவர்கள் திருநெல்வேலியில் நடைபெற்ற ஆர்ப்பாட்டத்தில் தெய்வத்திருமகன் ஐயா முத்துராமலிங்கத் தேவர் அவர்களை இழிவுபடுத்தும் விதமாக அவதூறு கருத்துகளைப் பேசியிருப்பது அவசியமற்றது; வன்மையான கண்டனத்துக்குரியது. தென் மாவட்டங்களில் தற்போது நடந்தேறும் படுகொலைகள் குறித்த கண்டன ஆர்ப்பாட்டத்தில் அக்கொலைகளைத் தடுக்கத்தவறிய அரசை கண்டிப்பதை விடுத்து தெய்வத்திருமகன் ஐயா முத்துராமலிங்கத் தேவர் அவர்களைப் பற்றி அவதூறு கருத்துகளைப் பதிவு செய்திருப்பது அதிர்ச்சியும், வேதனையும் அளிக்கிறது. தமிழ்ச் சமூக மக்கள் தெய்வமாகப் போற்றக்கூடிய தெய்வத்திருமகன் ஐயா முத்துராமலிங்கத் தேவர் அவர்களை இழிவுபடுத்துவது, பெருகி வரும் தமிழர் ஓர்மையைச் சீர்குலைக்கும் செயல் அன்றி வேறில்லை. இத்தகைய பேச்சுகள் பெரும்பான்மை தமிழ்ச்சமூகமான தேவர் சமூக மக்களின் மனங்களைக் காயப்படுத்தி,  தேவையற்ற மனக்கசப்பினை ஏற்படுத்தி, பெரும் மோதலையும், தீர்க்க முடியாத பகைமையும் உருவாக்க உதவுமே அன்றி, அதைத்தவிரத் தேவேந்திர குல வேளாளர் மக்களுக்கு ஏற்படப்போகும் நன்மை என்ன? ஐயா இம்மானுவேல் சேகரனார் அவர்களை எவ்வளவு வேண்டுமானாலும் புகழ்ந்து பேசலாம். அதற்காக பசும்பொன் முத்துராமலிங்கத் தேவர் அவர்களை இழிவுபடுத்திப் பேசுவது தவறானது. தமிழர்கள் தெய்வங்களாக வழிபடும் முன்னோர்களைத் தற்கால அரசியலுக்காக இழித்துரைப்பது ஏற்றுக்கொள்ளவே முடியாது.    தமிழ்ச்சமூக மக்களாகிய தேவர், தேவேந்திரர் மக்கள் நீண்டகாலமாகப் பிரிந்து, பிளந்து கிடப்பதற்கு திராவிட, இந்தியக் கட்சிகள் செய்த சூழ்ச்சி அரசியலே காரணமாகும். இரு சமூக மக்களிடையே, பகைத்தீயை மூட்டி குளிர்காய்வதையும், அவர்களின் மோதலில் சிந்தும் இரத்தத்தைக் குடித்து ஆட்சி அதிகாரத்தை அடைவதையும் திராவிட – இந்திய அரசியல் ஓநாய்கள் காலங்காலமாகச் செய்து வருகின்றனர். ஐம்பது ஆண்டுகாலமாக அத்தகைய சூழ்ச்சி அரசியலுக்குப் பலியான கடந்தகாலத் தலைமுறையின் காயங்களிலிருந்தும், கண்ணீரிலிருந்தும் தற்போதைய தமிழிளந்தலைமுறையை மீட்டு ஒன்று சேர்த்து தமிழர்களுக்கென்று வலிமைமிக்க ஓர்மை அரசியலைக் கட்டி எழுப்புவதே தமிழ்த்தேசியமாகும். அதற்காக அரும்பாடு ஆற்றிக்கொண்டிருக்கும் வேளையில், அதனை வீழ்த்தும் வகையில் பொறுப்பற்று மீண்டும் மீண்டும் வெறுப்புப் பேச்சுகளை விதைப்பது தமிழினப்பிளவை ஏற்படுத்துமே தவிர ஒருபோதும் ஓர்மையை ஏற்படுத்தாது. இந்த மண்ணில் நாம் தமிழர் கட்சி வந்த பிறகுதான் தாத்தா இம்மானுவேல் சேகரனார் சிலைக்கு தேவர் சமூகப் பிள்ளைகளும், தாத்தா பசும்பொன் முத்துராமலிங்கத்தேவர் சிலைக்கு தேவேந்திரர் சமூகப் பிள்ளைகளும் என்னுடன் வந்து மாலைபோட்டு மரியாதை செலுத்தும் வரலாற்றுப் பெருமாற்றத்தை இந்த மண்ணில் உருவாக்கியது. தமிழ்த்தேசிய ஒருமைப்பாடுதான் இன்றைக்கும், என்றைக்கும் தேவையான அரசியல் நிலைப்பாடு. அதனைத் தடுத்து, கெடுத்து தெற்கே தேவரும் – தேவேந்திரரும் ஒன்றாக நிற்கக் கூடாது, வடக்கே படையாச்சியும் – பறையரும் ஒன்றாகிவிடக்கூடாது என்று கருதுவது, அதற்காகச் சதிசெய்வது திராவிட – இந்திய அரசியல். அதற்குத் துணைபோவது தமிழ்த்தேசியம் ஆகாது. அதனை நாம் தமிழர் கட்சி ஒருபோதும் ஆதரிக்காது. தமிழர்கள் பிரிந்து பிளந்து நின்றால்தான் தமிழர் அல்லாதவர்கள் இந்த நிலத்தை நிரந்தரமாக ஆள முடியும் என்பதுதான் திராவிட – இந்திய அரசியல் கோட்பாடு. அதனைத் தகர்ப்பதுதான் தமிழ்த்தேசிய அரசியல் கோட்பாடு. அதற்குத் தடைக்கல்லாக எவர் வந்தாலும் ஏற்கமாட்டோம். எதிர்ப்போம்! ஆகவே, தமிழர் ஓர்மையைக் கருத்திற்கொண்டு, மள்ளர் மீட்பு களத்தின் நிறுவனத்தலைவர் செந்தில் மள்ளர் அவர்கள் தெய்வத்திருமகன் ஐயா முத்துராமலிங்கத்தேவர் குறித்த அவதூறுப் பேச்சுக்கு வருத்தம் தெரிவிக்க வேண்டுமென வலியுறுத்துகிறேன். - செந்தமிழன் சீமான் தலைமை ஒருங்கிணைப்பாளர் நாம் தமிழர் கட்சி