سب یاد رکھا جائے گا ڈاکٹر جاوید حیات راولاکوٹ، آزاد کشمیر / کینیڈا 14 جون 2026 آزاد کشمیر میں عوامی حقوق کی موجودہ تحریک کسی ایک دن، ایک واقعے یا کسی سیاسی جماعت کی مہم کا نتیجہ نہیں۔ یہ برسوں کی معاشی مشکلات، بڑھتی ہوئی مہنگائی، انتظامی کمزوریوں، سیاسی بے حسی اور عوامی مسائل سے مسلسل چشم پوشی کا فطری ردِعمل ہے۔ جب لوگوں کے مسائل حل نہ ہوں، جب فریاد سننے والے کان بند ہو جائیں اور جب مکالمے کے دروازے مسلسل بند رکھے جائیں، تو احتجاج عوام کا آخری سہارا بن جاتا ہے۔ سڑکوں پر نکلنے والے لوگ کسی سازش کا حصہ نہیں ہوتے بلکہ ایک ایسے معاشرے کی آواز ہوتے ہیں جو خود کو نظرانداز اور بے بس محسوس کر رہا ہو۔ اسی لیے موجودہ صورتحال کی ذمہ داری صرف کسی ایک حکومت پر نہیں ڈالی جا سکتی۔ اس کی ذمہ داری اس پورے سیاسی نظام پر عائد ہوتی ہے جس نے برسوں تک عوامی مسائل کو پس منظر میں رکھا اور اقتدار کی سیاست کو ترجیح دی۔ آج اگر عوام اپنے بنیادی حقوق کے لیے سراپا احتجاج ہیں تو اس کے اسباب کو محض حالیہ واقعات میں تلاش کرنا حقیقت سے فرار کے مترادف ہوگا۔ گزشتہ دنوں سردار عتیق احمد خان، شاہ غلام قادر اور ماجد خان کے بیانات سننے کا موقع ملا۔ حیرت اس بات پر ہوئی کہ تینوں کی زبان ایک تھی، بیانیہ ایک تھا اور ہدف بھی ایک۔ ان کے نزدیک ایکشن کمیٹی اور اس سے وابستہ لاکھوں عوام ریاست مخالف ہیں، پاکستان مخالف ہیں، اور ان کے ساتھ مکالمے کے بجائے طاقت کے ذریعے نمٹا جانا چاہیے۔ سوال یہ ہے کہ آخر کیوں؟ اس کی وجہ یہ ہے کہ جب عوامی تحریکیں طاقتور اور موروثی سیاسی ڈھانچوں کے لیے خطرہ بننے لگتی ہیں تو سب سے پہلے ان کی ساکھ کو نشانہ بنایا جاتا ہے۔ انہیں غدار، ایجنٹ یا ریاست مخالف قرار دے کر اصل مسائل سے توجہ ہٹائی جاتی ہے۔ ایک ایسا بیانیہ تشکیل دیا جاتا ہے جس میں عوام کٹہرے میں کھڑے دکھائی دیتے ہیں اور اقتدار کے ایوان خود کو منصف کے روپ میں پیش کرتے ہیں۔ حقیقت یہ ہے کہ گزشتہ کئی ماہ سے بعض "باریک وارداتیے" مسلسل اس کوشش میں مصروف رہے کہ عوامی حقوق کی اس تحریک کو ریاستِ پاکستان کے مقابل لا کھڑا کیا جائے۔ کوشش یہ رہی کہ پاکستان اور آزاد کشمیر کے عوام کے درمیان اعتماد، محبت اور تاریخی وابستگی کے رشتوں میں دراڑیں ڈالی جائیں۔ بدقسمتی سے بعض اقدامات اور بعض بیانیے اس مقصد کو تقویت دیتے دکھائی دیتے ہیں۔ تاریخ کا سبق مگر بڑا واضح ہے اسلام آباد میں بیٹھے فیصلہ سازوں کو یہ حقیقت بروقت سمجھ لینی چاہیے کہ: نفرتوں کا بوجھ ریاستیں اٹھاتی ہیں، لاشیں عوام کے گھروں سے اٹھتی ہیں، جبکہ سیاسی فائدے چند چالاک کردار اور ان کے خاندان سمیٹ لیتے ہیں۔ تصادم کے نتائج کبھی محدود نہیں رہتے؛ ان کی قیمت نسلیں ادا کرتی ہیں۔ آج کئی انسانی جانیں ضائع ہو چکی ہیں۔ گھروں میں کہرام برپا ہے۔ مائیں اپنے بچوں کی سلامتی کے لیے پریشان ہیں، بہنیں اور بیٹیاں اضطراب کا شکار ہیں، اور خاندان اپنے پیاروں کی خیریت کے منتظر ہیں۔ ایسے میں بعض سیاسی چہروں کی خاموشی مزید تکلیف دہ محسوس ہوتی ہے۔ یہ خاموشی محض خاموشی نہیں بلکہ ایک سیاسی رویہ، ایک اخلاقی ناکامی اور عوامی دکھ درد سے لاتعلقی کا اظہار ہے۔ بعض اوقات خاموشی الفاظ سے زیادہ بلند آواز ہوتی ہے۔ تاریخ صرف یہ نہیں دیکھتی کہ کس نے کیا کہا، بلکہ یہ بھی یاد رکھتی ہے کہ کون بول سکتا تھا مگر بولا نہیں، کون آگ بجھا سکتا تھا مگر خاموش تماشائی بنا رہا، اور کون اپنے لوگوں کے دکھ میں شریک ہونے کے بجائے سیاسی مصلحتوں کے حصار میں قید رہا۔ عوام آج تمام فریقین سے جواب طلب کر رہے ہیں۔ کون تھا جس نے مکالمے کے بجائے تصادم کی راہ اختیار کی؟ کون تھا جس نے آگ بجھانے کے بجائے اس پر تیل ڈالا؟ کون تھا جس نے اشتعال انگیز بیانات اور نفرت آمیز تقریروں کے ذریعے معاملات کو سلجھانے کے بجائے مزید الجھایا؟ کون تھا جس نے عوامی مطالبات کو سننے کے بجائے انہیں غداری اور بغاوت کا نام دیا؟ کون اپنے لوگوں کے ساتھ کھڑا رہا اور کون اقتدار کے ایوانوں میں خاموش بیٹھا رہا؟ کون دوہرا کھیل کھیلتا رہا؟ اور وہ کون عناصر اور قوتیں تھیں جو معاہدۂ مظفرآباد پر عملدرآمد کی راہ میں رکاوٹ بنتی رہیں اور جنہوں نے مسائل کے حل کے بجائے بحران کو طول دینے میں کردار ادا کیا؟ وقت سب سے بڑا منصف ہوتا ہے۔ وقت گزر جاتا ہے، حکومتیں بدل جاتی ہیں، عہدے ختم ہو جاتے ہیں اور طاقت کے مراکز تبدیل ہو جاتے ہیں، مگر کردار محفوظ رہتے ہیں۔ تاریخ کے صفحات پر صرف فیصلے نہیں بلکہ نیتیں، رویے اور کردار بھی درج ہوتے ہیں۔ 1/2